Alter Ego (Exist M)

Дэбютны альбом гурта Exist M, унікальнай зьявы менскай цяжкай сцэны, улюбёнца сталічнай клубнай публікі. Гурт актыўна гастралюе па гарадох Беларусі, дзякуючы чаму заслужыў рэпутацыю бескампраміснага жывога выканаўца. У актыве Exist M, акрамя ўсяго астатняга, некалькі ўзнагародаў музычных конкурсаў: другое месца ў намінацыі «Адкрыцьцё году» на Metalfront Music Awards-2009, а таксама выступы на некалькіх буйных фестывалях, да прыкладу Басовішча-2010 (Польша), дзе гурт быў ізноў адзначаны другой прэміяй фестывалю.

Аляксей Кузьняцоў:

«Мы дастаткова доўга йшлі да выпуску гэтага запісу — больш за паўтара гады. За гэты час матэрыял некалькі разоў перарабляўся, пераасэнсоўваўся, бо мы хацелі зрабіць рэліз цэласным і скончаным, і на нашую думку, гэта цалкам атрымалася. Хацелася б выказаць падзяку нашаму студыйнаму гукарэжысёру Яраславу Таміла і дызайнеру Кацярыне Радзько за той вобраз і атмасферу міні-альбома, якую яны дапамаглі нам стварыць, увасобіўшы нашыя ідэі і пажаданьні. Мы спадзяемся, што многія слухачы змогуць знайсьці ў гэтым рэлізе сваё Альтэр Эга».