Апісаньне

Менскі postmodern metal-гурт Like a Gossamer стварылі ў 2003 годзе гітарыст Алесь Акульчык, кампазітар і аранжыроўшчык Дзяніс Голін (Weeping Twilight) ды паэтка-сонграйтарка Алена Жукава.

Першапачаткова гурт граў gothic/doom/death metal з англамоўнай лірыкай. Паступова музыка пачала змяняцца у бок прагрэсіву і неакласікі. Англамоўныя тэксты саступілі месца беларускамоўным.

Цягам 2004–2007 гадоў Like a Gossamer канцэртаваў на Беларусі, граў на фестывалях Memento Mori Fest I-III, Vox Femina: Tribute to Flёur, Metal Hearts, Labirint Fest 3, «Рок супраць СНІДу».

Выступаў у Менску разам з гуртом Ashen Light. Быў удзельнікам «Адборышча 2007».

У кастрычніку 2006 года Like a Gossamer выпусціў сінгл «Дарога», тытульная кампазіцыя якога трапіла ў складанку слушнай беларускай музыкі «Прэм'ер Тузін 2007» (30 найлепшых песняў 2007 года паводле версіі партала music.fromby.net, цяпер – tuzin.fm).

Паралельна музыкі супрацоўнічалі з іншымі беларускімі фолк- ды рок-калектывамі: Алесь Акульчык увайшоў у склад гурта Rokash, Дзяніс Голін граў у Cor-Set, Testamentum Terrae, Re1ikt.

Узімку 2007-га Like a Gossamer пачаў запісваць дэбютны альбом «Kliatva viernasci» («Клятва вернасці») з бубначом Аляксеем Гладышам (Vicious Crusade, Deadmarsh). А ўлетку бас-гітарыст ды адзін з лідэраў праекту Дзяніс Голін раптоўна захварэў і гурт вымушаны быў прыпыніцца.

Праз пяць гадоў змагання з цяжкой хваробай Дзяніс вярнуўся да працы.

На фінальнай стадыі запісу да Like a Gossamer далучыліся сэсійныя музыкі: вакалістка Rokash Паліна Дулінец ды гітарыст Пятра Ялфімава, а таксама гуртоў Aillion і Яnkey Зміцер Мікуліч.

Звядзенне і мастэрынг альбома зрабіў менскі гукарэжысёр Павел Сініла (Everest Media).

CD «Kliatva viernasci» выйшаў 28 студзеня 2014 года.

Цяпер Like a Gossamer працуе як студыйны праект, які можа аднавіць канцэртную дзейнасць, калі з'явяцца музычныя аднадумцы.