Фестываль "Наш Грунвальд 2013"

Апублікавана 22 ліпеня 2013, 20:58 у Рэпартажы

З 20 па 21 ліпеня ў Дудутках прайшоў пяты міжнародны фестываль «Наш Грунвальд», прысьвечаны перамозе войска Вялікага Княства Літоўскага і Каралеўства Польскага над Тэўтонскім Ордэнам, якая выканала значную ролю для Беларусі, Польшчы, Літвы і ўсёй Эўропы.
Калі нарэшце скончыўся мой паўтарагадзінны шлях у Дудуткі, і я выйшаў з аўтобуса, прагна ўдыхаючы сьвежае паветра, майму погляду паўстаў вялікі намётавы лагер і ўваход у музейны комплекс.
Пры ўваходзе ўнутр адразу ж у вочы кінуўся сярэднявечны кірмаш: мужчыны ды прыгожыя дзяўчыны ў сярэднявечных адзеньнях, рамесьнікі, прадаўцы цікавых сярэднявечных цацанак, усе да аднаго апранутыя ў сярэднявечныя вопраткі (дарэчы: удзельнікам фестывалю забаронена было карыстацца ўсялякімі сучаснымі тэхналогіямі).
У гэты час на галоўнай пляцоўцы, якая знаходзіцца побач са сцэнай, суровыя Ліцьвіны бясконца біліся з Крыжакамі (якіх чамусьці заўсёды было больш), то разьбіваючы суперніка, то адступаючы.
Дарэчы, ваш пакорны слуга дурань, таму ня трапіў на ранішнія рэйсы і ледзь як прыехаў толькі ў 17:30. А таму прапусьціў Урачыстае адкрыцьцё фестывалю, Турнір збраяносцаў, Рыцарскі турнір, Турнір пяцёрак ды яшчэ шмат усялякіх цікавых рэчаў.
Але да майго шчасьця рэканструкцыю Грунвальдскай бітвы затрымалі з-за дрэннага надвор'я, і я трапіў як раз да яе пачатку. Праліўны дождж не спыніў ні варожыя войскі, ні гледачоў, затое надаў шмат эпічнасьці гэтаму і без таго прыгожаму моманту.
Рэканструкцыя прайшла пасьпяхова, і Ліцьвіны перамаглі над Крыжакамі, дарэчы, выкарыстоўваючы тую ж тактыку, што і пятнаццатага ліпеня, шэсцьсот рокаў таму.
Празь некаторы час пачалося самае цікавае, а менавіта канцэрт «Баль пасьля бітвы», на які ўласна я больш за ўсё і хацеў патрапіць.
Гэтым вечарам і ноччу для гледачоў гралі:
Hardwood, Irdorath, Znich, Litvintroll, Нейро Дюбель, Gods Tower ды Imprudence.

Я ня буду пачынаць гаварыць пра музыку гэтых гуртоў, таму як у кожнага зь іх ёсьць свой арыгінальны і непаўторны стыль, што зрабіла гэты канцэрт для мяне адным з найлепшых праведзеных у гэтым року у Беларусі.
Варта толькі заўважыць, што нягледзячы на моцны дождж, які пачаўся падчас выступу гурта Litvintroll, шэрагі слухачоў зусім не парадзелі. Людзі працягвалі апантана ды весела адрывацца, што яшчэ раз даказвае каштоўнасьць такіх мерапрыемстваў.

Пасьля я пайшоў піць, таму нічога ня памятаю ды таму нічога болей не напішу.