Класіфікацыя металістаў

Апублікавана 8 лютага 2015, 17:50 у Цікавае

На сёньняшні дзень у сьвеце назьбіралася аграмадная колькасьць ведаў па ўсіх галінах навукі, гаспадаркі, культуры. І такая зьява як класіфікацыя дапамагае сістэматызаваць веды, каб было зручней у іх арыентавацца. Моладзевыя субкультуры – аб’ект навуковых і ня толькі дасьледваньняў. Металісты, хіпі, байкеры, скінхэды (але большасьць зь іх я называю “скінькедамі”, бо нават я іхную ідэялогію ведаю лепш за іх саміх) – гэта і ёсьць класіфікацыя субкультур. Але і знутры пералічаных груповак існуе свая класіфікацыя. Давайце паглядзім, якія класіфікацыі металістаў сустракаюцца на прасторах сеціва.

Самая простая і распаўсюджаная – гэта класіфікацыя па стылях металу, якімі захапляецца чалавек: фолк–металіст, дэт-, трэш-, ню-, олдскул– і г.д. Такое дзяленьне ўсім вядомае, і на ім спыняцца ня будзем.

Даволі цікавая класіфікацыя прыведзеная на Луркамор'і: з гумарам, крытыкай, падрабязна, але зь ёй лепей знаёміцца людзям, якія субкультуру ведаюць вельмі добра, каб зразумець усе нюансы.



Я дасканала ня памятаю калі, але не пазьней за 2008 г. на прасторах сеціва мне на вочы трапіў артыкул, не навуковы, а па тыпу блога невядомага аўтара (колькі потым не шукаў – ня мог знайсьці), у якім апісаныя ўзроўні, празь якія праходзіць металіст цягам сваёй, так бы мовіць, металевай кар’еры. У тыя часы інтэрнэт, кабельнае і спадарожнікавае тэлебачаньне не былі такімі распаўсюджанымі, як цяпер, таму некаторыя прыклады і выразы, да і сама класіфікацыя, магчыма, будуць не такімі актуальнымі, але я хачу максімальна блізка захаваць ідэю і тэкст невядомага аўтара. Рускамоўны варыянт, выкладзены мной на Драгметалах у 2011 г., і пры загугліваньні “класіфікацыя металістаў” ён знаходзіцца на 2 ці 3 месцы. Пачнем.

1-ы ўзровень

На гэтым узроўні чалавек толькі даведваецца, што існуе такі музычны стыль – метал. Пачынаецца знаёмства зь ім шляхам праслухоўваньня самых папулярных прадстаўнікоў гэтага жанру (дакладней песьні), якія часьцей за ўсё зьяўляюцца па ТБ ці радыё, або якія вядомыя яго знаёмым (Арыя, Metallica, Within Temptation, Nightwish, “Final Countdown” Europe). На гэтым узроўні ў большасьці ўзьнікае думка: то дзіцячая забава, гэта несур’ёзна, і юны металіст папаўняе шэрагі гапаты, у кампаніі якой шкадуе па свайму “непацанскаму” мінуламу. З гэтага ўзроўню сыходзіць каля 90%. Астатнія ідуць далей.

2-гі ўзровень

На гэтым узроўні металіст пачынае слухаць самыя папулярныя і паважаныя ў метал-плыні гурты: Iron Maiden, Children Of Bodom, Lacrimosa, Dimmu Bоrgir, Death і інш., а таксама даведваецца пра тое, што ў метале існуе аграмадная колькасьць жанраў, і адбываецца выбар найбольш цікавага і блізкага. З гэтага ўзроўню таксама шмат людзей зь лёгкасьцю сыходзяць пад уплывам зьнешніх фактараў (армія, пастаянны ціск з боку родных, сустрэча другой палоўкі, якая не пераварвае метал і інш.), але вышэйпералічаныя гурты калі-некалі слухае.

3-ці ўзровень

Калі на другім узроўні металісту зьнешнія і ўнутраныя фактары ўзьдзеяньня не перашкаджалі яго захапленьню металам, ён пачынае слухаць гурты, вядомыя даволі вузкаму колу людзей.

На гэтым этапе металіст спрабуе сам пісаць музыку, граць на музычным інструменце, ствараюцца гурты, адбываюцца першыя выступы. З гэтага ўзроўню сыходзяць адзінкі.

4-ы ўзровень

На гэтым узроўні знаходзяцца музыкі гуртоў, якія слухаюць металісты 1-га і 2-га ўзроўняў, і часткова — 3-га; грамадскія дзеячы, якія прасоўваюць культуру металу (некаторыя журналісты, мастакі, фатографы, арганізатары канцэртаў).



АМАЛЬ УСЕ КЛАСІФІКАЦЫІ ЎМОЎНЫЯ, асабліва аб’ектаў і зьяваў непрыроднага характару паходжаньня! Таму нельга ўспрымаць яе за чыстую манету, але яна крыху адлюстроўвае іерархічнасьць нашай субкультуры, а іерархія існуе ўсюды – закон прыроды.

P.S. А ці ведаеце, што існуюць шалёныя металісты?