Споведзь Ньюстэда

Апублікавана 13 студзеня 2014, 12:43 у Навіны

Праўда пра сыход зь Metallica. Праз 13 год

На працягу 2013-га году BelMetal інфармаваў вас пра новы праект былога басіста Мятлы — Jason’a Newsted’a. Прайшло ўжо 13 гадоў з таго моманту, як ён ужо ня частка фармацыі пад назвай Metallica. За гэты час Джэйсан вельмі пладавіта папрацаваў у такіх гуртах як Echobrain, Voivod, WhoCares, а ў 2013-ым заснаваў гурт імя сябе прыгожага і выдаў вельмі цікавы альбом, на якім ня толькі адыграў на басу, але і сьпеў.

Зусім нядаўна ў інтэрв’ю каналу ScuzzTV Jason Newsted урэшце расказаў сапраўдную прычыну свайго сыходу са знакамітага гурта. Фанатам Мятлы далей чытаць абавязкова, і ўсім астатнім таксама будзе вельмі цікава нарэшце даведацца пра гэтую даўнюю гісторыю.

Заўвага: перад прачытаньнем раім гахнуць чарку. Бо Джэйсан пэўна вельмі хваляваўся і на момант інтэрв’ю пасварыўся і зь языком, і з мовай.

Jason Newsted: “Я ніколі не расказваў пра гэты выпадак і ня ўпэўнены, што павінен рабіць гэта зараз. Было шмат таго, што празь некаторы час прывяло б да непрыемнай сітуацыі. Найбольш неверагодным мне падаецца, што нехта здагадваецца аб тым, што мэнэджмент Metallica быў вельмі, вельмі ўсхваляваны і зацікаўлены гуртом Echobrain. Яны жадалі крыху зарабіць на ім і хацелі, каб я сумяшчаў працу ў абодвух гуртах. Мэнэджэры адчувалі, што Echobrain быў вельмі добрым, вакаліст быў вельмі моцным, і ўсё гэта не паўплывала на Metallica, таму што было зусім іншай справай у музычным сэнсе, а я быў у Metallica, што дало б новаму праекту добрае паходжаньне”.

Ён працягвае: “Яны гаварылі даволі пераканаўча, што то выдатны запіс, які яны ўключылі ў офісе і што ён усім прыйшоўся даспадобы, ім вельмі спадабаўся вакал, і ўвогуле ўсё было проста фантастычна, маўлялі, давайце нешта зробім з гэтым. James даведаўся і быў вельмі незадаволены. Я лічу, ён жадаў пакласьці канец гэтай сітуацыі, бо думаў, яна паўплывае на Мятлу. На той момант мэнэджэры былі зацікаўлены больш маім праектам, які ня меў нічгога агульнага ня зь ім, ня зь Metallica”.

Басіст/вакаліст рэзюмуе сітуацыю наступным чынам: «Я паняцьця ня маю, аб чым Hetfield думаў акрамя абароны таго, што ён цэніць, а як ён гэта рабіў — яго справа. Ён абараняе тое, што любіць, занадта жорстка і агрэсіўна, як сам ён і казаў. Вось адкуль зьявілася ўсё гэта. Людзі, на якіх я разьлічваў на працягу 15 гадоў, каб яны дапамаглі маёй кар'еры, дапамаглі Metallica, клапаціліся аб маіх грошах… Зрабілі ўсё гэта. Спачатку яны гаварылі, што новы гурт фантастычны, і яны б хацелі дапамагчы зь ім. James даведаўся пра іх планы, і ўжо празь некалькі дзён яны патэлефанавалі і сказалі, што на вялікі жаль ня змогуць дапамагчы Echobrain…”

З гэтага інтэрв’ю можна зрабіць толькі адзін вынік: вінаваты не дуэт Hetfield-Ulrich, ня сам Jason Newsted. Тагачасны мэнэджмент Мятлы спачатку зацікавіўся сайд-праектам басіста і зрабіў яму выгадную прапанову, але пасьля размовы з франтмэнам чамусьці рэзка саскачыў і нават не паспрабаў улагодзіць складаную сітуацыю паміж музыкамі, якую мэнэджэры самі і зрабілі. Увогуле, вельмі часта мэнэджэры падманвалі і падманваюць гурты, яны зьбягалі з ганарарамі гурта і рабілі шмат ня вельмі добрых рэчаў. А ўсё з-за таго, што мноства людзей гэтай прафессіі цікавяць толькі грошы.

Відэа гэтага інтэрв'ю, для самых пільных і недаверлівых чытачоў, пачынаецца а 30-ай хвіліне і яно на ангельскай мове.