У вас у ва усіх сьпіны ...ЧОРНЫЯ!

Апублікавана 3 красавіка 2012, 01:47 у Навіны

Час сарваць покрыва і афіцыйна заявіць: канешне ж, безумоўна, інфармацыя аб адраджэньні гурта BATHORY, на вялікае шчасьце (а то вы ўяўляеце, што атрымалася б!) была ўсяго толькі першакрасавіцкім жартам.

У сяброў і паплечнікаў Квортана Сэта, у музыкаў, што ў розныя гады гралі зь ім, хапае, хвала Багам ды ім самім, і розуму, і, самае галоўнае, сумленьня, не распачынаць дурную справу. BATHORY былі, ёсьць і будуць зьявай свайго часу, і, спадзяемся, яшчэ не адзін дзясятак маладых хлапцоў (а мо й дзевак!) па ўсім сьвеце, наслухаўшыся «Зьмярканьня Багоў» або «Крыві на лёдзе», возьмуць у рукі гітары, каб працягнуць годную справу, распачатую вялікім швэдзкім музыкам — каб ствараць сапраўдны, шчыры й бескампрамісны metal.
Ну, а ў якасьці суцяшэньня для старых фанатаў і, асабліва, для маладых мэталістаў, якія, магчыма, й ня чулі раней аб такім гурце (усё бывае на сьвеце!), зьмяшчаю тут некалькі песень з раньніх альбомаў BATHORY, якія праклалі дарогу ад trash да black metal, заклалі асновы цяжкой «язычніцкай» музыкі, ды зрабілі ўнёсак у заснаваньне плыні doom metal.

Stay under the Sign of the Black Mark! Hail the hordes of BATHORY! Let One Eye Old Man show you the Way, and let He give Quorthon so more Glory in the Hall of Hammerheart Heroes!

Песьня «Жняяр», зь першай плыткі BATHORY, што звалася аналягічна назьве калектыву ды пабачыла сьвет у далёкім 1984 годзе. Дадзеная вэрсыя арыгінальная, а не рэмаставаная ў двухтысячныя. Вось з такой музыкі пачынаўся блэк-мэтал, шаноўны фанат «крэдлоффілз»…



«Народжаная, каб згарэць» — песьня аб ведзьме з другога альбому гурта, «Вяртаньне...» («Вяртаньне Цемры й Зла»), 1985 год.



«Жанчына Цёмных Жаданьняў» — песьня з альбому «Пад знакам Чорнай Маркі» (1986 г.) аб Альжбэце Баторы, якая ня толькі была сваячніцай Яго Міласьці гаспадара Стэфана Баторыя, караля польскага і вялікага князя літоўскага, але й знакамітай вядзьмаркай, што, разам з Уладзіславам Цэпэшам, заклала аснову вампірска-вядзьмарскага вобразу ў эўрапейскай культуры. У тым ліку, Чорная Княгіня дала імя аднаму швэдзкаму мэтал-гурту :-).



Пачынаючы з альбому «Кроў… Агонь… Сьмерць...» (1988 г.), BATHORY стала пераходзяць да вікінгаўска-паганскай тэматыцы ў песьнях, пачатак чаму быў пакладзены яшчэ на папярэдняй плытцы.



Альбом «Сэрца-Молат» (1989) зьяўляецца далейшым разьвіцьцём стараскандынаўскай тэматыкі творчасьці і прыкладам усё большай эвалюцыі ў бок дум-мэталу. Кліп на песьню «Хтосьці едзе ў бухту Асаў» створаны на аснове кадраў з фільму аб часах вікінгаў, які здымаўся па сцэнары Квортана, але так і не пабачыў сьвет.



«Зьмярканьне Багоў» (1991) — ня проста музыка, а эпічнае палатно, заснаванае на лепшых здабытках эўрапейскай клясычнай музыкі, добрым знаўцам якой быў Квортан. Гэты альбом шырэйшы за вызначэньні «мэтал» ці «рок-музыка», яго можна сьмела лічыць часткай скарбонкі агульнаэўрапейскай і агульнасусьветнай музычнай спадчыны.