Сядзіба "Лябёдка Іванаўская"

Сёння ў сядзібе “Лябёдка Іванаўская”, што ў вёсцы Галавічполе, знаходзіцца інтэрнат для дзяцей з асаблівасцямі псіхафізічнага развіцця. Таму аглядзець гэты, безумоўна, вельмі прыгожы і каштоўны архітэктурны помнік, асабліва знутры, падаецца даволі цяжкім. Але мы з сяброўкай, абраўшы звыклыя пад час вандровак ролі журналіста і гісторыка, здолелі ўвайсці ў давер да працаўнікоў інтэрната. Не дужа чэсна, канешне, але ўзнагародай нам стаў падрабязны экскурс у гісторыю сядзібы, пабудаванай у пачатку ХХ стагоддзя ў стылі мадэрн, а таксама апісанне сённяшняга стану гэтага дзівоснага помніка архітэктуры.
У якой ступені ўзвышаныя і светлыя пачуцці выклікае знешняе аздабленне сядзібы, у такой ж ступені сумным і анякаватым падалося знаёмства з яго жыхарамі. З цяжарам на сэрцы я задавала пытанні і ўздымала камеру, каб сфатаграфаваць дзетак, карткі якіх, я ведала ўжо тады, я ніколі не буду змяшчаць у інтэрнэце і паказваць нічыім пытлівым вачам… Калі мы віталіся з ”Лябедкай Іванаўскай”, я быццам глядзела на сядзібу зусім іншымі вачыма.
Гэты архітэктурны помнік, безумоўна, варты наведвання. Але рыхтуйцеся да таго, што сэрца вашае будзе споўнена не лёгкасцю і павагай да велічнай беларускай архітэктуры, а жалем і болем з-за ўбачанага ў “Іванаўскай Лябёдцы” павольнага, бясперспектыўнага дзіцячага існавання…

vk.com/architekture