Сядзібны дом “штаб Баграціёна” і касьцёл св. Вацлава

Ваўкавыск. Горад, у якім не захаваліся якіясьці каштоўныя архітэктурныя дзівосы. Але ён мае своеасаблівы настрой і атмасферу; жыхары Ваўкавыска адрозніваюцца ад іншых на Гродзеншчыне, ці то своеасаблівым пачуццём гумару, ці то падыходам да штодзённых адносінаў між сабой, ці то проста мне ўсё гэта падаецца, але дзеля апошняга, відавочна, усё ж такі існуе нейкая прычына…

Гаворачы аб Ваўкавыску, нельга не ўзгадаць, што менавіта тут, з нагоды змяшчэння ў гэтым горадзе ў 1812 годзе, пад час вайны з Напалеонам, штаб-кватэры П. І. Баграціёна, знаходзіцца яго дом-музей. Ваенна-гістарычны музей у гонар вялікага палкаводца быў заснаваны ў 1949 годзе. У 1955 годзе перад будынкам з’явіўся бронзавы бюст Баграціёна, створаны вядомым беларускім скульптарам Заірам Азгурам.
Найбольш вядомы архітэктурны помнік Ваўкавыска – касцёл св. Вацлава, пабудаваны ў 1846-1848 гадах у стылі позняга класіцызму.

Шмат разоў я бывала ў Ваўкавыску, з кожным звязаны непаўторныя, яскравыя, цёплыя ўспаміны. Аднак для наведвання музея Баграціёна і вывучэння арзітэктурнай планіроўкі горада быў абраны асабісты дзень, марозны, зімовы, які мы са спадарожцам цалкам падаравалі вандроўцы па вузенькім вулічкам гэтага ўтульнага гарадка.