Litvintroll прадстаўляе ўсеагульнай увазе трэйлер новага альбома 'Czornaja Panna'
Апублікавана
у
Навіны
Менскі фолк-метал гурт Litvintroll прадстаўляе ўсеагульнай увазе свой другі альбом «Czornaja Panna». Гэты альбом азнаменаваў сабою заканчэньне трохгадовага шляху, які прайшоў гурт з моманту выданьня свайго дэбютнага дыска ў далёкім 2009 годзе.За гэты час зведаў зьмены як склад ансамблю – прыйшлі новыя клавішнік, гітарыст і ўдарнік, так і гучаньне – яно стала больш насычаным, шчыльным, зрабіўся прыкметным уплыў дума.
Альбом «Czornaja Panna» складаецца з 8 трэкаў, кожны зь іх не падобны адзін да аднаго. Але нягледзячы на стылістычную разнастайнасьць, дыск гучыць маналітна. У гэтым заслуга ня толькі саміх музыкаў, але і гукарэжысёра Аляксея Балотава, які працаваў над саўндам.
Da Siabra – песьня-віншаваньне для сябра – вядоўцы праграмы Hello Folks на люблінскім радыё Centrum. Не дазволіўшы абмежавацца дзяжурнымі фразамі, яна нарадзілася сама і была запісаная спачатку ў акустычным варыянце, а потым і аранжыраваная ў метале.
Kryzak (Piesnia Pra Troliau II) — працяг п'есы з падобнай назвай з папярэдняга альбома. Напісаная ў гадавіну Грунвальдскай бітвы, песьня, аднак, распавядае гісторыю вялікай бойкі зь некалькі іншага боку, чым прынята.
Kamarova Smierc — народная песенька, якая пакладзена на бадзёры дыскатэчны рытм са змрочнай фінальлю ў стылі Type O Negative.
Lipka — яшчэ адна народная песьня, на гэты раз польская. Пеьсня — крык, пеьсня — плач, гісторыя пра дзяўчыну, якая выдаецца замуж за нялюбага. У Польшчы, дзе Litvintroll часты госьць, Ліпку ведаюць усе, таму ідэя сыграць яе прыйшла даўно. Галоўнай жа мэтаю было зрабіць гэта небанальна.
Karaleuskaja — часам бывае так, што гратэскавы персанаж нібы сыходзіць са старонак кнігі – страшнай і злоснай казкі. Азірніцеся вакол, прыслухайцеся. Магчыма, зараз вы чуеце ягоны голас, які сьпявае дыфірамбы самому сабе. Цікава, як складзецца яго лёс у нашым сьвеце?
Czornaja Panna — усе ведаюць сумную гісторыю Барбары Радзівіл. Але Чорная Панна – гэта ня толькі прывід Нясвіжскага замка. Вярнуўшыся зь ніжніх планаў быцьця, яна штурхае свайго каханага ў абдымкі вар'яцтва, асуджаючы на гібель і яго, і ўвесь яго род. Песьня падарыла сваё імя і задала тон усяму альбому. Сьмерць, якая хаваецца за цудоўным абліччам Чорнай Панны, наганяе ўсіх.
Ad Astra — мы ўсе імкнемся да зор. Але навошта? Хтосьці прагне пазнаньня нязьведанага, а нехта бяжыць, пакінуўшы за сьпіной пылаючы свет.
Lasun — чалавек зьнішчае ўсё вакол сябе. Зямля шчодрай рукою дзеліцца зь ім сваімі багацьцямі, але чалавеку заўсёды мала. Ён забыў запаветы продкаў, ён ня думае аб сваіх нашчадках. І ён не сыдзе ад адплаты. Старажытная багіня Мара — яшчэ адна іпастась Сьмерці, пакліча яго імя і вырве трапятлівае сэрца з грудзей ворага.
2 верасьня, усяго за некалькі дзён да заканчэньня працы над альбомам, адбылася трагедыя. Падчас канцэрту ў Гомелі прама на сцэне памёр басіст Алег Клімчанка.
Альбом «Czornaja Panna» прысьвячаецца яго памяці.
Твая музыка будзе гучаць вечна, Алег.
Пераклад: DuDka
2 каментара