Медыяпраект «Край.BY» ад Budzma
Апублікавана
у
Навіны
Праект будзе зьмяшчаць 15 відэа зь 15 гарадамі і мястэчкамі Беларусі. Кожная серыя – новае месца, таямніцы, гісторыі, інтрыгі і яскравыя факты, якія зьбірае творчае аб’яднаньне «ПАН-студыя».Першы выпуск перадачы пра Солы — беларускае мястэчка, дзе цягам чатырох стагодзьдзяў разгортваліся ды прыпыняліся войны, дзе на месцы царквы вырастаюць касьцёлы, а сінагога пераўтвараецца ў царкву; мястэчка, ля якога адбылася буйнейшая бітва паўстанцаў Касьцюшкі.
Прэс-сакратар грамадскай культурніцкай кампаніі «Будзьма беларусамі!» Алесь Плотка расказвае, што праект — цудоўная магчымасьць вандраваць, не выходзячы з дому:
«Натуральна, што Беларусь вартая хутчэй 15 тысячаў відэаролікаў пра кожную вёсачку і горад, але пачынаць усё роўна трэба з малога. Мы радыя запрасіць наведнікаў партала www.budzma.org у віртуальныя зімовыя вандроўкі разам з Паўлам Харланчуком і ягоным напарнікам – віртуальным вірусам беларушчыны са студынага кампутара.»
Па словах Алеся, прыемна чытаць і бачыць падвышэньне цікавасьці і ў беларусаў і ў замежнікаў да гістарычных месцаў нашае краіны, таму кампанія спадзяецца, што ўвесну, калі сыйдзе сьнег і 15 серый скончацца – унутраны турызм Беларусі адчуе шалёны ўздым.
Наступныя серыі, як нам давялося даведацца, будуць пра Дубнікі, Гервяты і Вараняны.
0 каментароў