Маэстра Джэф Луміс

Апублікавана 24 кастрычніка 2012, 17:58 у Пясочніца

Джэф Луміс (анг. Jeff Loomis) – амерыканскі гітарыст-віртуоз і адзін з унікальных прадстаўнікоў сусветнай цяжкай музыкі. Чалавек са знешнім выглядам бялявага воіна-вікінга; гітарны бог, які праз сваю творчасць прапануе займальнае падарожжа па свеце гітарных рыфаў, акустычных пасажаў і прыгожых мелодый.

Джэф нарадзіўся 17 верасня 1971 г. у 160 км ад возера Мічыган, у горадзе Эплтан, штат Вісконсін, знакаміты сваёй вытворчасцю малочнага сыру. У якасці вытворцы сыру провід Луміса не ўбачыў і наканаваў яму іншы лёс. Гітару ў рукі Джэф узяў дастаткова рана – у 9 год, але сур’езна пачаў займацца толькі з 15. Ды так сур’езна займаўся, што ўжо ў 16 год перамог на мясцовым музычным конкурсе “Guitar Wars”.

На двары ішоў 1987 г. Пасля выхаду альбому “Peace Sells… But Who's Buying?” у стане культавых “Megadeth” пачаліся праблемы са складам: гітарыст Крыс Поланд і барабаншчык Гар Самуэльсан былі выгнаны з групы за празмернае захапленне наркотыкамі. Малады Луміс вырашыў, што ён ужо дастаткова падрыхтаваны, каб замяніць адсутнічаючыя звёны ў “Megadeth”, і падаўся на аўдыенцыю да Мастэйна. Пасля праслухоўвання Мастэйн быў шчыра захоплены добрай тэхнікай выканання маладога гітарыста, аднак адмовіў. Тым не менш, шмат вех жыцця Джефа Луміса ў наступным будзе так ці інакш звязана з “Megadeth” і яго музыкантамі.

Пазней, бліжэй да канца 1980-х гг. Джэф пазнаёміўся з Джэйсанам Бекерам і Марці Фрыдмэнам. Менавіта Фрыдмэну пасля спаткання з Лумісам будзе наканавана стаць з 1990 па 2000 гг. новым гітарыстам “Megadeth”. Фрыдмэна ужо дарослы Джэф праз 20 год пакліча госцем на запіс уласнага сольнага альбому.

Сам Джэф Луміс адпраўляецца на радзіму сусветнага гранжу – у Сіэтл, штат Вашынгтон, дзеля таго каб граць трэш-метал. Там ён далучаецца да групы “Sanctuary”. Група нічым характэрным не адзначылася, акрамя таго, што яна спыніла дзейнасць пад націскам гранжу і стала падмуркам для створанай у 1994 г. культавай progressive metal групы “Nevermore”.

У “Nevermore” прайшла большасць творчага часу вялікага шрэдэра. У складзе яго было запісана 7 паўнафарматных студыйных альбомаў, дзе Лумісу даводзілася выконваць ролю асноўнага кампазітара. “Nevermore”, змяніўшы ў сваім складзе шмат добрых музыкантаў сярод якіх былі ў свой час “канібал” Пэт О’Браян і “мегадэсер” Крыс Бродэрык, у рэшце рэшт, 21 красавіка 2011 г. адпусціў і Луміса. Як потым казаў вакаліст групы Уорэл Дэйн ““Nevermore” стала найвялікшай групай, якую загубіў алкаголь”.

Група заўсёды шмат гастралявала, што амаль не пакідала Джэфу Лумісу часу на ажыццяўленне ўласных ідэй, якія ён не жадаў рэалізоўваць у “Nevermore”. Аднак, да шчасця фанатаў ён знайшоў час для запісу 10 фантастычных інструментальных кампазіцый. Так на свет з’явіўся яго першы сольны альбом “Zero Order Phase”. Альбом быў выпушчаны адначасова з сольнікам Уорэла Дэйна, які быў названы “Praises to the War Machine”. У музычнай прэсе яны заўсёды параўноўваліся. І ва ўсіх параўнаннях сольны альбом Луміса перамагаў.

Матэрыял быў значна больш разнастайны, чым той, што пісаўся для “Nevermore”. Тут чуецца і класічныя пасажы, і агрэсія, і прыгожыя мелодыі, і зразумела шрэд. Шмат хто параўноўваў гэты альбом з чытаннем добрай кніжкі, дзе па сюжэце, там дзе гэта трэба, змяняецца хуткасць апавядання, лінія і стыль. Усе барабанныя партыі на альбоме запісаў барабаншчык былых “Sanctuary” Марк Арынгтан. Да таго ж былі запрошаны тры госці, з якімі Джэф так ці інакш сябраваў і меў стасункі. Рон Яжомбек выканаў разам з Лумісам “Jato Unit”, Пэт О'Браян – кампазіцыю “Rage Against, Disaster”, а джазавы басіст Майкл Манрынг – трэк “Cashmere Shiv”.



Праз тры гады, 23 жніўня 2011 г., калі Джэф канчаткова пакінуў склад “Nevermore”. Ён разам з барабаншчыкам “Soilwork” Дзіркам Верб’юрэнам адправіўся ў студыю з мэтай запісу новага альбому, які назвалі «Plains of Oblivion». Афіцыйны рэліз яго адбыўся 10 красавіка 2012 г. І атрымаўся альбом зусім не такі, як яго папярэднік. З’явіліся кампазіцыі з вакалам, дзеля чаго спецыяльна былі запрошаны Ihsahn на “Surrender” і Крысціна Роўдз на “Tragedy And Harmony” і “Chosen Time”. Не мінулі паўдзельнічаць на запісу шрэдэры Марці Фрыдмэн, Тоні МакАльпін і Крыс Поланд. У цэлым, атрымаўся альбом асобных элементаў, ніяк не звязаных між сабой. Водгукі ў прэсе былі значна горшымі. Асноўная канва ў іх вызначалася смуткам па разваленым і страчаным “Nevermore”.



Зараз Джэф Луміс актыўна гастралюе па свеце з уласнай групай імя сябе. Яе склад выглядае так:
Джэф Луміс – гітара
Джо Нюррэ – гітара/вакал
Грэг Маклін – бас
Ануп Састрай – барабаны.

Пачаў стварацца новы матэрыял. 4 кастрычніка 2012 г. была выпушчана новая песня, якая называецца “А Liar’s Chain”. Сам Джэф так каментуе стварэнне новага матэрыялу:

“”А Liar’s Chain” – першая з трох песень, якую я запісаў з маёй групай для афіцыйнай прэзентацыі анлайн. Мы пачалі граць яе ў час нашага апошняга амерыканскага туру і яна была добра прынята фанатамі. Мне было так весела запісваць “Surrender” з Ісанам на вакале дзеля майго апошняга альбому, што я вырашыў стварыць больш песень, падобных на яе. Джо Нюррэ, які грае ў мяне на гітары на працягу апошняга году, мае забойны death metal вакал, і я падумаў, што будзе ідэальна зрабіць такую рэч з ім і астатнімі хлопцамі…”

Песня сапраўды атрымалася дэз-металічная. Калі так пойдзе далей, можна чакаць новай, больш цяжкой, вехі ў творчасці гэтага таленавітага музыканта.