death metal
Апублікавана 16 кастрычніка 2012, 12:46 у Пясочніца

“Некаторыя месцы немагчыма апісаць словамі, аднак яны валодаюць ўласцівасцямі вылячэння. Такія месцы адзначаны ўспамінамі і перажываннямі. Такія месцы захоўваюць чараўніцтва для ўсіх тых, хто іх наведвае… Гэтыя месцы ўнутры мяне ...”

Іх апісаннем, а можа і стварэннем займаюцца ўдзельнікі атмасфернага калектыву пад назвай “Dark Suns”. Яны выкарыстоўваюць у сваёй творчасці сумесь такіх накірункаў, як Progressive metal, Doom metal і Death metal.

Гурт быў утвораны ў 1997 г. у нямецкім горадзе Вітэнбергу, у тым самым горадзе на рацэ Эльба, дзе ў 1517 г. Марцін Лютэр вывесіў свае знакамітыя 95 тэзісаў супраць продажу індульгенцый.

Ніка Кнаппэ і Тобіас Гомліх, якія стаялі ў вытокаў, задумвалі “Dark Suns” як сайд-прект, які, аднак, з цягам часу вырас у паўнавартасную групу. У 1998 г. быў запісаны так і не выпушчаны ў будучым дыск “Below Dark Illusion”. Гурт удзельнічаў і нават займаў першыя месцы на фестывалях маладых выканаўцаў. Тым не менш, пастаянныя змены ў складзе не давалі магчымасці жыць поўным жыццём.

У 2001 г. пасля ўладкавання трывалага складу “Dark Suns” селі ў брандэнбургскую “Castle Sound Studio”, дзе запісалі і выдалі сваімі сіламі дэбютны рэліз пад назвай “Swanlike”. У 2004 г. у бельгійскай студыі “Galaxy Reference Mastering” альбом быў перавыданы з дзвюма дадатковымі кампазіцыямі: інструменталкай “In Silent Harmony” і “Suffering” з нявыданага матэрыялу 1998 г.

Цікавыя тэксты, эмацыянальна пададзены матэрыял, добрая якасць запісу – гэта рэчы, якія заслужылі станоўчыя водгукі прэсы і зацікаўленасць аматараў цяжкай музыкі. Бачна, што значны ўплыў на гурт аказалі легендарныя “Opeth”.

Лідэр “Opeth” Мікаэль Акерфельд у сваю чаргу так адазваўся пра дэбютнік “Dark Suns”: “Мы былі вельмі ўражаны. Я думаю, што гэта музыка вельмі прафесійная, жорсткая і цёмная… і гук цудоўны. Гэтыя хлопцы, без сумненняў, заслугоўваюць добрага рэкард-кантракту на моцным лэйбле”

Так і адбылося пасля словаў Акерфельда, толькі праз тры гады пасля. Гэтым лейблам апынуўся даволі вядомы ў Еўропе “Prophecy Production”. На момант падпісання кантракту быў падрыхтаваны матэрыял для трэцяга рэлізу, які ў будучым атрымае назву “Existence”.

“Існаванне” афіцыйна выйшла ў свет 25 лютага 2005 г. У цэлым, альбом працягнуў лінію свайго папярэдніка. Толькі зусім знік гроўл, а сам матэрыял па працягласці ў 75 хвілін набліжаўся хутчэй да Traditional doom рэлізаў. Як і на папярэдніку чутны значны ўплыў “Opeth”.

Самі музыканты характарызуюць “Existence” так: “”Existence” – гэта падарожжа скрозь летуценныя, эмацыянальныя, крохкія светы кожнага чалавека, гэта спроба адмежавацца ад цяжкіх наступстваў працэсу самапазнання”

Прайшло яшчэ два з паловай гады. “Dark Suns”накіраваліся ў студыю, каб запісаць новы альбом “Grave Human Genuine”, аб’яднаны новай канцэпцыяй.

“Grave” – гэта татальная прысутнасць цёмных сіл і непазбежнасць лёсу.
“Human” – паказвае прыярытэт інтэлектуальнай складаючай і глыбіню пошукаў.
“Genuine” – гэта адмова ад кампрамісаў у працэсе пошуку сваіх ідэялаў.

Па стылістыцы альбом прадстаўляе сабой сумесь інтэлектуальнага прог-року і змрочнага дум-дэзу. Павялічылася хуткасць і тэхнічнасць выканання, паменшылася працягласць матэрыялу – усяго гадзіна, — што зрабіла альбом больш простым да ўспрымання. На дапамогу ў запісу быў запрошаны басіст-віртуоз з “Pain of Salvation” Крыстафер Гільбенлёў. Матэрыял таксама быў вельмі цёпла сустрэты музычнай прэсай і прыхільнікамі змрочнай музыкі.

Праз тры гады, у 2011 г., быў выпушчаны апошні на сённяшні дзень рэліз “Dark Suns”, які атрымаў назву “Orange”. Такое ўражанне, што музыканты няспынна на працягу ўсяго творчага шляху сочаць за “Opeth” і імкнуцца ісці тым жа шляхам. Як і апетаўскі “Heritage”, “Orange” быў запісаны ў стылі прагрэсіўнага року 1970-х гг. і з’яўляецца на сённяшні момант самым неадназначным альбомам каманды, што бачна і па водгуках у прэсе.

На сённяшні дзень склад “Dark Suns” выглядае наступным чынам:
Ніка Кнаппэ – вакал, барабаны, перкусія
Марк Кнаппэ – гітара, вакал
Торстэн Венцэль – гітара, вакал
Якаб Мюлер — бас
Экхард Майстэр – клавішы