Septic Flesh – The Great Mass (2011)

Апублікавана 3 чэрвеня 2013, 15:47 у Рэцэнзіі

Season of Mist
10 tks./44 min.

01 The Vampire From Nazareth
02 A Greath Mass of Death
03 Pyramid God
04 Five-Pointed Star
05 Oceans Of Grey
06 The Undead Keep Dreaming
07 Rising
08 Apocalypse
09 Mad Architect
10 Therianthropy

Ані для кога не сакрэт, што адной з найбольш адметных і самабытных сцэнаў эўрапейскага мэталу зьяўляецца грэцкая. А ўжо альбомчыкі яе славутых гаплітаў SEPTIC FLESH аніяк нельга абмінуць. Тым болей, што ў астатнія гады гурт перажыў цікавую і неадназначную трансфармацыю, часткай якой зьяўляецца і праца 2011 году пад назвай “The Great Mass”.
Нагадаю, што дадзены калектыў на нейкі час прыпыняў сваю дзейнасьць, паставіўшы перад гэтым тлустую кропку ў выглядзе надзвычай удалага дыску 2003 году “Sumerian Daemons”. Можна сказаць, што на тым альбоме SEPTIC FLESH дасягнулі вяршыні свайго гучання, прынамьсі, на тагачасным этапе. Грут мог сьмела клянаваць “дэманаў”, застаючыся пры сваёй фанацкай базе. Можна сказаць, што прыблізна па такім шляху пайшлі калісьці сымфаблэкавыя брытанцы CRADLE OF FILTH, выдаўшы свой знакавы рэліз 2000 году. Але для нашчадкаў элінаў простыя дарогі не падыходзяць — SEPTIC FLESH у выніку абралі нашмат больш шчыры шлях: распад, і аднаўленьне, але зь іншым матэрыялам.
Аднак, альбом 2008 году “Communion” выдаўся надзвычай супярэчлівым. Перш за ўсё ў матэрыяле гучала нейкая выразная сырасьць – не, ня ў якасьці запісу, а ў агульным кантэксьце. Гэта была ўжо іншая, прынцыпова іншая ад ранейшай, музыка. Але яна яшчэ ня мела свайго выразнага твару. І вось у 2011 годзе гэты твар зьявіўся, зьявіўся ў выглядзе Вялікай Імшы Сьмерці.
Па шчырасьці, падчас праслухоўваньня ў мяне ўзьніклі асацыяцыі з трыма канкрэтнымі рэлізамі. Першы – той самы крэдлаўскі “Midian”, два астатнія – “дарослыя” дэзавыя альбомы BEHEMOTH “Zos Kia Cultus” ды “Demigod”. Як і “Midian” гэты альбом пранізаны выкшталцоным мэлядызмам, насычаны “сымфанічнымі” элемэнтамі, аднак, пры гэтым, ён ня скатваецца ў зручны для засвойваньня, і ад таго ані не цікавы, кактэйльчык, як гэта адбылося з наступнымі працамі “крэдлаў”. Тут усё на сваім мейсцы – “сымфанічная” частка мае ўласную нагрузку, выконвае яе цалкам, не засланяючы пры гэтым астатняга. BEHEMOTH’аўскія працы ўзгадваюцця пры ацэнцы агульнага гучаньня, таго лютага, шалёнага музычнага напору, глыбокага гроўлінгу, атмасфэры штармавых удараў, характэрных для сапраўдных узорных кшталтаў death metal, што каранямі сваімі сягаюць клясычных плытак MORBID ANGEL.
Такім чынам, разагрэўшыся на “Communion”, SEPTIC FLESH выдалі абсалютна сталую і надзвычай моцную работу — “The Great Mass” выразна азначыў сваё мейсца. Мейсца гэтае ў шэрагу лепшых эўрапейскіх мэтал-альбомаў астатняга часу і, пажадана, на паліцах мэталхэдаў. Рэліз таго варты.

Lutavit

9/10