13.10. Аutumnal metal

Апублікавана 15 кастрычніка 2012, 14:22 у Рэцэнзіі

Мерапрыемства пад назвай «Аutumnal metal» адгрымела 13 кастрычніка ў вядомым ўсім Rocker Bar'ы.

Чакалася штосьці вельмі цікавае: абяцалі «па-сапраўднаму цяжкую музыку», конкурсы ў выглядзе армрэстлінгу ды дрынкбаттлінгу, пераможца якога ня плаціць за піва.
Гэтак жа арганізатары зрабілі, відавочна, прыемны сюрпрыз для прадстаўніц жаночага полу: для іх уваход на канцэрт быў цалкам бясплатным. Няшчасным жа уладальнікам чэлесу прыпадала-такі плаціць заробленыя крывёю, потам ці чым там зараз зарабляюць, грошы.
Абяцаную ж «па-сапраўднаму цяжкую музыку» нам падносілі такія каманды як:

MINDCRAFT. Даволі якасны heavy metal, з пацешным фронтмэнам (з банданай на галаве зразумела, гэта ж хэві!) які валодае нядрэнным высокім чыстым голасам, з моднай хрыпатцой і на зьдзіўленьне добрым слыхам. Вядома, былі моманты, калі вакаліст не трапляў у ноты, асабліва на вярхах, але ў цэлым вакал гучаў на высокім узроўні.
Чаго ня скажаш пра бэк-вакал гітарыста, у якога нядрэнна атрымоўвалася выдаваць гукі падобныя на гроулінг і зусім не выходзіла сьпяваць.
Да тэхнікі ігры прэтэнзіяў ніякіх няма, гралі музыкі зладжана, амаль не зьбіваліся, і сур'ёзных памылак амаль не было.
У хлопцаў нядрэнная падача, і асноўныя дзеючыя асобы (а менавіта вакаліст і гітарыст-сьпявак) паводзілі сябе на сцэне добра. Астатнія ўдзельнікі гурта прастаялі як пні увесь выступ.
Што тычыцца музыкі, яна, на жаль, другагатунковая і вытрыманая ў духу «Ёсць яшчэ over9000 гуртоў, якія граюць дакладна такі ж нецікавы heavy».
Вынік апынуўся сумным: аніводнай жывой душы ля сцэны, хоць першы гурт на тое і першы.

WINTER NEVER ENDS, другі гурт у стылю death / trash metal паладзілі становішча.
Брутальны вакаліст, выйдучы на сцэну, першым чынам пажартаваў, што пакуль побач зь ёй ня зьявіцца хоць некалькі чалавек, гэта будзе не канцэрт, а звычайная рэпетыцыя. Гэта адразу прыцягнула ўвагу публікі
, і ля сцэны зьявілася некалькі фігур.
Празь некалькі хвілін пасьля таго, як WINTER NEVER ENDS пачалі такі граць, натоўп стаў заўважна большым. Люд сьцягваўся да сцэны, і нават аўтар гэтай рэцэнзіі не ўтрымаўся перад такой падачай і драйвам, якую паказалі гэтыя мужыкі.

Мужыкі выканалі два кавэры на такія гурты, як «KREATOR» і «AMON AMARTH».
Кавэр на вікінгаў «AMON AMARTH» гурт так і не дайграў да канца, проста на проста зьбіўшыся, але як ні дзіўна, гэта зусім не сапсавала агульнага ўражаньня.
Скончылі жа выступ WINTER NEVER ENDS з парваным карданам, і пад бурныя воплескі публікі выдаліліся са сцэны.
Увогуле гурт выдатна выглядае на сцэне. Франтмэн цудоўна працуе з публікай. WINTER NEVER ENDS без сумневу адны з фаварытаў гэтага фэсту.

NIGHTSILENCE трэцяя па ліку каманда. Граюць хлопцы ў стылю Melodic Death Metal з прыгожымі клявішнымі партыямі.
Ня гледзячы на тое, што выглядаюць яны як вельмі малады і неспрактыкаваны гурт, (мабыць зноў жа з-за сваіх паводзін: адзіным больш-менш актыўным чалавекам на сцэне быў вакаліст) граюць яны на зьдзіўленьне якасна і зладжана. Прыгожыя клявішныя партыі зьмяняюцца цяжкімі гітарнымі рыфамі і сакавітым гроўлінгам.
Аднак і тут не абышлося без падводных камянёў. Гурт жудасна паводзіць сябе на сцэне, а менавіта не паводзіць сябе ніяк. Як я ўжо пісаў, адзіная актыўнасьць была заўважана за вакалістам.
Ды і «чысты» вакал гітарыста (нейкая мода на безгалосых гітарыстаў) з гэтым жахлівым пастановачным хрыпам, часам псаваў ўсю карціну.
Але ў цэлым гурт пакінуў аб сябе станоўчае ўражаньне, і гэта другі і апошні гурт, які добра выступіў на гэтым канцерте.

Адразу ж пасьля выступу NIGHTSILENCE на сцэну залез у дровы п'яны вядоўца і пасьля некалькіх няўдалых спробаў мовіць загадзя падрыхтаваныя словы пачаў размаўляць з уяўнымі людзьмі ў зале.
Па справе было сказана толькі тое, што melodic death metal гурт RIVERDALE ня зможа выступіць з-за таго, што вакаліст трапіў у бальніцу.
Асабіста для мяне гэта было вялікім расчараваньнем, бо я ўжо быў знаёмы з творчасьцю RIVERDALE, і іх я больш за ўсё прагнуў пабачыць на гэтым канцэрце.
Што ж, пажадаем хутчэйшага выздараўленьня вакалісту.

І апошнім калектывам быў «death core чэлес зразумей што» гурт пад назвай INSGHT.
Мяркую, не памылюся, калі выкажу здагадку, што гэта быў самы малады гурт на фэсьце, бо падобныя ўсе былі на школьнікаў, за выключэньнем заўважаных мною гітарыста і фронтвумэн depressive black metal гурта «ТРЫЗНА», якія гралі тут на аналягічных інструмантах.
Перад пачаткам свайго выступу, музыкі доўга наладжваліся, адначасова жартуючы паміж сабой толькі адным ім зразумелымі жартамі, выкарыстоўваючы навошта для гэтага мікрафон.
Пачалі INSIGHT даволі нядрэнна, пакуль не заспявалі…
Вакалістка без прыкметы музычнага слыху і голасу жудасна фальшывіла. Вакаліст, да гэтага гарлапаніўшы скрымам, таксама не блістаў вакальнымі дадзенымі. У выніку атрымліваўся дзікі жах ды дысанансы.
Аднак нягледзячы на ўсю жудасьць выступу INSIGHT ў плане музыкі, ім атрымалася стварыць досыць вясёлую атмасферу. Таму як пад сцэнай многія актыўна танчылі… вальс ды й наогул п'яныя людзі стваралі чэрці што.
Гэтак жа, як ня дзіўна, у гітарыста апынуўся вельмі добры гроулінг. На мой погляд, нават лепшы, чым у вакаліста.
Ды і Outro ў іх апынулася даволі якаснае, ці то таму, што ніхто не сьпяваў, ці то таму, што я ўжо занадта шмат выпіў…

Нягледзячы на вялікую колькасць расчараваньняў, канцэрт атрымаўся добры.
Гэта ўсё, што я магу мовіць.
А вось армрэстлінгу і дрынкбатлінгу я так і не пабачыў…